جني
ẪĎμϊή
عدد الرسائل : 378
العمر : 42
تاريخ التسجيل : 01/02/2009
 |  موضوع: حملة أنا مش سلبى 1  الخميس مارس 19, 2009 12:48 pm | |
| هبدأ أقولكم نماذج تانية للسلبية و معناها وخطورتها و إزاى نبطل سلبية و نبقى إيجابيين؛ و دلوقتى تصورا معايا يوم من أيام شخص سلبى أو شخص ساكت عن حقه فهو سلبى أكتر!!
الساعة 5 الفجر: قام شلبى "ابن عم سلبى" من النوم علشان يصلى الفجر و كالعادة ماحاولش يتعب نفسه و يصحى أى حد معاه فى البيت حتى أخوه اللى نايم جنبه فى الأوضة!
الساعة 6 صباحا: قام شلبى يلبس هدومه علشان يروح كليته و بعد ماخلص لبس أخد بعضه و نزل يروح كليته و طبعا كالعادة بدأ يومة برحلة العذاب؛طلب الأسانسير و إستناه علشان يطلع بس مطلعش نادى على البواب و طبعا البواب نايم كالعادة لأن الباشا مش فارق له الناس اللى هاتروح شغلها و مدارسها و مع ذلك السكان سايبينه ياكل عيش علشان حرام و بيصعب عليهم و وراه كوم لحم و خد عندك!!
و بعد شوية طلع الأسانسير و الحمد لله، فتح شلبى باب الأسانسير فلاقى الواد كريم قدامه و بعد السلامات و الذى منه طلع كريم علبة السجاير من جيبه و ولع سجارة و عمال يطلع الدخان فى الأسانسير المكتوم أساسا و اضطر شلبى إنه يستحمل ريحة السجاير و يجى على نفسه حبتين ما علينا و صل الأسانسير للدور الأرضى!!
أول ما نزل شلبى راح على السوبر ماركت اللى جنب بيتهم علشان يشترى أى حاجة يفطر بيها على الصبح؛ و بعد ما أكل راح أعد يبص جنبه علشان يتأكد إن مفيش حد شايفه -ده إذا كان بيهمه أصلا- و راح رمى أكياس الأكل على الأرض فى الشارع و هو بيقول لنفسه "يعنى هتيجى عليا" و راح مشاور للتاكسى أو الميكروباص أو الأتوبيس أو ..... إلخ اللى يقابله علشان يلحق يروح كليته!!
ركب شلبى أخيرا و طبعا أول ما ركب بدأ فى سماع أحلى أغانى الطرب الهابط و النواح و التجعير اللى محدش عارف إذا كان اللى بيغنى واحد و لا واحدة و هل اللى بيغنى بيغنى أغانى حزن و لا فرح؟ أهو واحد بيجعر و خلاص و برده راضى و ساكت!!
و على السكة شاور للتاكسى كام واحد فى السكة فراح السواق وقفلهم و أخدهم معاه على السكة و طبعا إضطر شلبى إنه يتأخر شوية علشان سعادة الباشا السواق وقف مرة علشان يجيب سندوتش فول و هو ماشى و بعدين وقف مرة تانية علشان يجيب كباية شاى علشان يبلع و ده طبعا غير أنه هيوصل الناس اللى على سكة مع إنهم مش على السكة خالص. و أخيرا وصل شلبى لكليته و أقعد يتفاوض مع سواق التاكسى على الأجرة مع أنه بيركب كل يوم تقريبا بنفس الأجرة و لكن لازم ياخد دعوتين محترمين عليه طبعا من سواق التاكسى علشان مدفعش الأجرة المبالغ فيها جدا!!
وصل شلبى كليته أخيرا -ده طبعا بعد ما طهق من عيشته و كره اليوم اللى أتولد فيه و عايز يولع فى نفسه- و جه على نفسه و قال يعمل بأصله و قرر أنه يحضر المحاضرات على غير العادة لأنه فى أعتقاده إن اللى أتخرجوا كانوا عملوا إيه؟ أهم قاعدين على القهاوى لا شغلة و لا مشغلة! علشان كده مش فارقة معاه أنه يتخرج أو لأ و لو أتخرج فاللهم أجعلنا من المقبولين.
دخل شلبى المدرج و بعد شوية دخل الدكتور و بدأ يشرح المحاضرة و لكن على رأى المثل جت الحزينة تفرح ملقتلهاش مطرح؛ فبمجرد إن الدكتور بدأ يشرح من هنا و الناس بدأت تتكلم من هنا و كأنهم مستنيين الدكتور يشرح و طبعا أخونا سلبى معلش قصدى شلبى راضى بالأمر الواقع و يعنى هيعمل أيه؟ هيطلع هو الفطوطة اللى فيهم و يقولهم يبطلوا كلام أو يقول للدكتور و لو حتى فى ورقة و يكون بكدة خان زمايله. و بعد مداولات مع نفسه قرر أنه يتكلم هو كمان يعنى جت عليه!! و للأسف الصوت بدأ يعلى فالدكتور قرر يعاقب الناس عقاب جماعى فخرج و ساب المحاضرة!!
بعد المحاضرة قعد صاحبنا يلوم نفسه علشان جه على نفسه و حضر. بعد شوية من السلامات و فينك و محدش بيشوفك و الذى منه من سلامات على الصحاب قرر شلبى أنه يروح البيت و هو مروح شاف واحدة ماشية هى و صحبتها و فى شوية عيال وراهم نازلين معاكسة فيهم بجد حاجة تقرف و اللى يغيظك أن البنتين مش معبرينهم و لكن هتقول إيه لقلة الأدب و بدل ما صاحبنا يتعب نفسه و يقولهم بس يا حبيبى بس يا بابا كمل طريقه عادى! لكن لو كانت واحدة يعرفها كان عمل فيها أبو الرجالة و بعد العيال دى عنهم لكن هتقول إيه؟
رجع شلبى للبيت بعد ما دب المشوار على الفاضى و هو راجع ركب الأتوبيس المكيف و طبعا ركب و قعد مستريح 24 قيراط و بعد شوية ركبت ست كبيرة فى السن راح بص نحية الشباك علشان ميقومش و يقعدها. و صل شلبى البيت و طلب الأسانسير فامنزلش سأل البواب قله معلش يا أستاذ أصل الباب باظ من كتر هبد الباب و العجيب إنه و هو واقف نزل ميدو من الأسانسير و هبد الباب وراه و محدش إتكلم و قاله إقفل الباب براحة المرة الجاية أو أى شىء من هذا القبيل!!
فتح شلبى الباب و غير هدومه و فتح التلفزيون و قعد يقلب فى القنوات؛ و تهور و جاب إحدى القنوات الإخبارية و قعد يشوف الأخبار و يدوب هما خمس دقايق و غير القناة و هو بيقول "مفيش فايدة عمرنا ما حنتغير أو نتقدم و هنفضل طول عمرنا عايشين فى فساد و جهل و تخلف" و راح جايب إحدى القنوات الرياضية علشان يشوف أخبار الكورة و بعد كدة مسك الجورنال يشوف أخبار العربيات و المتشات و هلم جرة طبعا من غير ما يتعب نفسه و يشوف أخبار بلده أو أخبار العالم أو الإقتصاد أو أى شىء مفيد!!
نزل شلبى يصلى المغرب و أخد بعضه و راح يشوف صحابه؛ قعد معاهم شوية و بعد كدة راح يصلى العشاء و طبعا من غير ما يكلف خاطره و يقولهم تعالوا صلوا يعنى هما كانوا مستنينوا علشان يقوموا!! و بعدين هيقعدوا يتريقوا عليه و على أيه خلينا بإحترمنا أحسن و يعنى هو أنا اللى هأصلح الكون!!
رجع شلبى البيت و دخل سريره و قعد يفكر فى حاله لأول مرة فى حياته تقريبا؟ هل هو كده إنسان بجد! إنسان له الحق فى أن يعيش و أن يحيا حياة كريمة؟ يستطيع فيها أن يعترض على الضرر و الظلم الواقع عليه؟ و أن يطالب بحقه؟ أن ينفع الناس بعلمه و خبرته؟ هل ممكن تتقدم بلادنا و الناس عايشة فيها بالشكل ده؟ كل واحد عايش لنفسه و فى حاله رافع شعار و أنا مالى، يعنى أنا اللى هصلح الكون، شىء ميخصنيش، مش مشكلتى، هيا جت عليا، ..... إلخ إلخ.
أيه رأيكم أنتم؟ و كام واحد فينا زى شلبى أو على الأقل زيه فى حاجات كتير أو قليل بيعملها فى حياته اليوميه؟
=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=
و ده كان نموذج واحد بس من نماذج السلبية اللى أصبحت منتشرة فى حياتنا و أصبحنا نتقبلها عادى جدا!! | |
|
خاطب الحور
co-admin
عدد الرسائل : 107
العمر : 37
تاريخ التسجيل : 24/02/2009
| | موضوع: رد: حملة أنا مش سلبى 1 الجمعة مارس 20, 2009 4:17 pm | |
| | |
|
