رمضان قرب... يلا نجرب

رمضان قرب... يلا نجرب
لا شك أنها زيارة ضيف عزيز وغالىٍ ومبنشوفوش الا مرة واحدة بس فى العام بس المرة دى بتكون اقامة كاملة ليلا ونهارا لمدة شهر ورغم انه ضيف عزيز علينا وغالى جدا الا انه يحمل لنا الهدايا
ياااااااااااااااااااه يعنى هو الضيف وهو اللى هيكرمنا كمان يعنى احنا مش هنتعب فى حاجة خااااااااااالص والاجمل من كدة ان الهدايا دى من الخالق سبحانه وتعالى
من ربنا وعز وجل اللى اختار رمضان لينزل فيه القرآن دستور الأمة ونور هدايتها بل هداية البشرية كلهم إلى يوم القيامة.
حد شاف ضيف زى كدة ؟ ضيف بهذا الكرم
ده جايبلنا الجنة وجاى يزورنا والمطلوب مننا ان احنا نحسن استقباله بس مش اكتر وهو مش هياخد مننا اى حاجة بالعكس هو هيدينا كل حاجة
راحة بال وهدء واستقرارا
وطبعا الاجر والحسنات و ليلة القدر
كل ده ولسة بردو مش عايزين نحسن الاستقبال

ضيف زى ده ازاى ما نسعدش بيه ومنتمناش عدم مغادرته لبيوتنا وحبيبك النبى بيقول:
صلى عليه امال
عليه افضل الصلاة والتسليم "لو علمت أمتي ما في رمضان من الخير لتمنت أن تكون السنة كلها رمضان".

كان رسول الله- صلى الله عليه وسلم- يشتاق لرمضان من رجب شوقًا شديدًا فيدعو ربه ويُعلِّم المسلمين أن يدعوا ربهم بهذا الدعاء الجميل "اللهم بارك لنا في رجب وشعبان وبلغنا رمضان".. فهل من المعقول أن يكون كل هذا الفرح بقدوم رمضان فرحًا ماديًّا بالكنافةِ والقطائف والمكسرات ومدفع رمضان والإفطار على الخشاف وقمر الدين ثم المسلسلات حتى السحور على الاكل اللى بنخزنه فى المعدة تخزينًا لغاية المغرب لنستكمل مدد الأكل والشراب؟ الحاجات دى ممكن تسعد الاطفال ، أما الكبار أما المؤمنون الكبار فهؤلاء يقول الله عز وجل لهم : ﴿قُلْ بِفَضْلِ اللَّهِ وَبِرَحْمَتِهِ فَبِذَلِكَ فَلْيَفْرَحُوا﴾

يا جماعة احنا النهاردة فى بداية شعبان وخلاص كلها تلاتين يوم
والضيف الغالى ده هيخبط على باب كل واحد فينا
عارفين الصحابة كانو يستعدوا لرمضان قبله بست شهور
يااااااااااااااااااااااه
ست شهور
احنا على كدة مش هيكفينا شهر
لا هيكفينا وهنلحق ان شاء الله
بس لو عندنا شوية همة وعزيمة ونوينا ان احنا منسبش الضيف ده غير واحنا واخدين منه كل اللى جايبهولنا معاه
رمضان شهر غسيل الذنوب وتطهير القلوب رمضان شهر القرآن وشهر صلة الأرحام؛ رمضان شهر الجهاد ومناصرة المجاهدين بالدعاء والتبرع والمقاطعة لعدونا وعدوهم.

روى سلمان الفارسيّ (رضى الله عنه) قال: خطبنا رسول اللهِ (ص) في آخر يومٍ من شعبان فقال أيّها الناس قد أظلّكم شهرٌ عظيمٌ مباركٌ ، شهرٌ فيهِ يومٌ خيرٌ من ألف شهرٍ ، جعل اللهُ صيامهُ فريضةً ، وقيامهُ تطوّعاً ، من تقرّبَ فيهِ بخَصلةٍ من الخير كان كمن أدّى فريضةً فيما سواهُ، ومن أدّى فريضةً فيهِ كمن أدّى سبعين فريضةً فيما سواهُ، وهو شهر الصبر، والصَّبرُ جزاءهُ الجنّة، وشهر المواساةِ وشهرٌ يزدادُ فيهِ رزقُ المؤمن، منْ فطَّر فيهِ صائماً كان مغفرةً لذنوبهِ وعتق رقبةٍ من النار، وكان لهُ مثلُ أجرهِ من غير أنْ ينقصُ من أجرهِ شيئا).

وكان رسولُ الله (ص) يترقّبُ شهر رمضان وهو الشهر الذي يلقاهُ جبريل (عليه السلام) فيُدارِسُهُ القرآنَ وكان فيهِ أكثر اجتهاداً في عبادةِ ربّهِ عزَّ وجلَّ ، وكان أجودَ بالخير فيهِ من ريح المرسلةِ، وكان عليه الصلاة والسَّلامُ يدعوا اللهَ قبل دخول رمضانَ فيقولُ:[ اللهمَّ بارك لنا في رجب وشعبان وبلِّغنا رمضانَ ] وعند قدوم شهر رمضان يقولُ لأهلِ بيتهِ وأصحابهِ أتاكم رمضانَ شهرُ بركةٍ، يغشاكم اللهُ فيهِ، فيُنزِلُ الرحمة، ويَحُطُّ الخطايا، ويستجيبُ فيهِ الدعاء، ينظر اللهُ إلى تنافسكم فيهِ، ويباهي بكم ملائكتهُ، فأروُا اللهَ من أنفسكم خيراً، فإنَّ الشقيَّ منْ حُرمَ فيهِ رحمةَ اللهِ

زي مافي ناس كثير كان رمضان سبب تغييرها ، انت كمان تقدر تخلي رمضان سبب تغييرك
كل واحد فينا يقدر والله بس نستعين بربنا يا جماعة
عارفين كل الظروف مهيئة لينا فى رمضان
مفيش الشياطين
الدنيا بتبقى مليانة طاعة
وكل حاجة تساعد عاوز ايه تانى بقى
يا جماعة فى رمضان يا اما نكون ممن ادرك رمضان ففاز ونجا
او ممن ادرك رمضان فخاب وخسر
كل واحد بقى يختار لنفسه اللى هو عاوزه عاوز تبقى ايه من اللى فاز ونجا ولا من اللى خاب وخسر
يارب كلنا نبقى من اللى فاز ونجا
احنا مش هنتكلم عن فضل رمضان هنا
لكن المطلوب من كل واحد فيكم هيدخل الموضوع ده ويشارك ان شاء الله معانا انه يكتب تصور او اقتراحات لبرنامج فى رمضان نمشى عليه وفى الاخر هنختار برنامج مثالى من كل الاقتراحات ونعمله كلنا وهيبقى فى حاجات تانى كتير ان شاء الله
والبرنامج اللى هتكتبوه المفروض يكون فيه
1\ شعار لرمضان (يعنى كل واحد يختار شعار هيمشى عليه ويحطه قدامه طول رمضان)
2\ اهدافك من رمضان السنة دى ايه
3\ اعمال هنعملها فى رمضان وهنطبقها
4\ انت والدعوة فى رمضان
5\اقتراحات

دى الحاجات المطلوبة من كل واحد فينا
انا برنامجى جاهز لكن هكتبه فى الاخر ان شاء الله
وفى اخر الموضوه هنعمل البرنامج اللى كلنا نحافظ عليه
وكمان هيبقى فى ورد محاسبة طبعا طبقا للبرنامج اللى هنتفق عليه وكل واحد يطبعه عنده وكل يوم يقيم نفسه
وفى اخر الشهر كل واحد يقول هل هو نجح فى تنفيذ البرنامج ده ولا لا

يا ريت يا جماعة ما نبخلش على نفسنا بالثواب وبالاستعداد لرمضان
وكل الاعضاء تبلغ بعض
علشان يبقى اول رمضان لينا السنة دى مع بعض اجمل رمضان فى حياتنا
وان شاء الله انا هحاول اجمع اكبر كتب او دروس او محاضرات او مقالات عن رمضان وهنزلها فى الخيمة الرمضانية
وكلنا نساعد بعض علشان نوصل للجنة مع بعض ان شاء الله
يلا مستنى ردودكم واقتراحاتكم

» ليكن رمضان هذا .. خير رمضان يمر عليك في حياتك !!
» آداب الرسول في شهر رمضان
» شوية افكار رمضان و القرآن